İdman 01:01 / 19.02.2026
Ukrayna hökuməti Rusiyanın öz milli rəmzləri ilə yarışlara qatılmasına etiraz olaraq, qarşıdakı Paralimpiya Oyunlarını institusional səviyyədə boykot etmək qərarına gəlib.
Ukraynanın gənclər və idman naziri Matvey Bedni bildirib ki, rusiyalı idmançıların öz ölkələrinin bayrağı altında çıxış etməsinə icazə verilməsi qəbuledilməzdir. Bu səbəbdən Ukrayna rəsmi nümayəndə heyəti İtaliyada təşkil olunacaq Qış Paralimpiya Oyunlarında iştirakdan imtina edir.
Nazir öz bəyanatında qərarın sərtliyini belə ifadə edib:
"Təşkilatçıların bu anlaşılmaz qərarına cavab olaraq, Ukrayna rəsmiləri Oyunlara qatılmayacaq. Biz nə açılış mərasimində, nə də digər rəsmi tədbirlərdə təmsil olunacağıq."
Xatırladaq ki, 2025-ci ilin sentyabrında Beynəlxalq Olimpiya Komitəsinin (BOK) rəsmisi Kristi Koventri təşkilatın Rusiyanın iştirakı ilə bağlı mövcud yanaşmanı dəyişməyəcəyini vurğulamışdı. Lakin sonradan Rusiyanın öz bayrağı ilə çıxış etmək imkanı qazanması Ukrayna tərəfinin ciddi etirazına səbəb olub.
Qeyd edək ki, Qış Paralimpiya Oyunları bu ilin 6-15 mart tarixlərində İtaliyada keçiriləcək. Ukraynalı idmançıların yarışlarda iştirakı gözlənilsə də, dövlət rəsmiləri səviyyəsində heç bir təmsilçilik olmayacaq.
109 oxunub
