İdman 01:17 / 17.03.2025
İspaniya La Liqasında 28-ci turun oyunları davam edir. Turun mərkəzi oyununda "Atletiko" klubu "Barselona"nı qəbul edib. Madriddə təşkil olunan oyunun ilk yarısı Dieqo Simeoninin komandasının üstünlüyü ilə başa çatıb. Julian Alvares ilk hissənin artırılma dəqiqələrində fərqlənib. Madrid təmsilçisi 70-ci dəqiqədə Şarlotun qolu ilə hesab arasındakı fərqi iki topa çatdırsa da qələbə hesabını sona qədər qoruya bilməyib. 72-ci dəqiqədə Levandovski, 78-ci dəqiqədə isə Ferran Torresin qolları ilə hesabı bərabərləşdirən katalonlar 90+2-ci dəqiqədə Lamin Yamalın qolu ilə hesabda önə keçib. Lakin bu da oyunda son qol olmayıb. Ferran Torres 90+7-ci dəqiqədə dəqiq zərbə ilə fərqlənməklə "Barselona"nın 4:2 hesablı qələbəsini rəsmiləşdirib. Beləliklə, katalonlar 2:0 hesabı ilə məğlub olduqları oyunda geri dönüş edərək üç xal qazanıblar. Qələbə sayəsində aktivindəki xalların sayını 60-a çatdıran "Barselona" yenidən liderliyi ələ keçirib. "Barselona"dan bir oyun çox keçirən "Real"ın aktivində də 60 xalı olmasına baxmayaraq "Kral klubu" ikincidir. "Atletiko" isə 56 xalla 3-cü pillədə qərarlaşıb.
11010 oxunub
