İdman 23:27 / 26.01.2025
Azərbaycan ilk dəfə olaraq qar voleybolu üzrə ölkə çempionatı keçirilib. Yanvarın 25-26-da Azərbaycan Voleybol Federasiyasının təşkilatçılığı ilə keçirilən yarış "Şahdağ” Turizm Mərkəzində baş tutub.
Çempionatda 4 qadın ("Azərreyl”, "Murov Az Terminal”, "Gəncə”, U-21), 4 kişi ("Azərreyl”, "Murov Az Terminal”, "Gənclər”, U-21) komandası iştirak edib. Yarışın ilk günündə oyunlar dairəvi sistem üzrə keçirilib. İki gün davam edən turnirdə qadınların mübarizəsində üçüncülük üçün "Gəncə” klubu U-21 komandasını 2:0 hesabı ilə məğlub edərək bürünc medal qazanıb. Final görüşü isə "Azərreyl” və "Murov Az Terminal” komandaları arasında olub. Həlledici matçda 2:0 hesabı ilə qalib gələn "Azərreyl” ilk Azərbaycan çempionu adını qazanıb.
Kişilərin mübarizəsində isə bürünc medalı "Gənclər” komandasını 2:0 hesabı ilə məğlub edən U-21 kollektivi qazanıb. Finalda isə "Azərreyl” və "Murov Az Terminal” komandaları qarşılaşıb. Rəqibinə 2:0 hesabı ilə qalib gələn "Azərreyl” Azərbaycan çempionatının qalibi olub.
Final oyunlarından sonra qalib komandaların mükafatlandırma mərasimi keçirilib. Qaliblər kubok və medallarla mükafatlandırılıblar.
10499 oxunub
