SON XƏBƏRLƏR

23 May - Beynəlxalq Güləş Günüdür

İdman

23.05.2026, 09:09

Bu gün Beynəlxalq Güləş Günü kimi qeyd olunur.

Olimpiyadunyasi.com xəbər verir ki, güləş idmanın ən qədim növlərindən biridir. Müntəzəm olaraq Olimpiadanın proqramında yer alan güləş mübarizə, əzmkarlıq, güc və dəyanətin rəmzidir. Türk və İslam dünyasında da məşhur olan güləş əsas idman növlərimizdən biri sayılır. Təsadüfi deyil ki, bütün idman növləri arasında beynəlxalq yarışlarda, xüsusən də dünya və Avropa çempionatlarında və Olimpiya Oyunlarında Azərbaycan adına ən böyük uğurlara güləşçilərimiz imza atıblar. Sözsüz, bu uğurda güləşçilərimizin və məşqçilərimizin əməyi, əziyyəti və zəhməti əsas rol oynayıb. Ancaq xalqımızın güləşə olan böyük marağı, güləşçilərimizə verilən hədsiz böyük dəstək də diqqətdən kənarda qala bilməz. Güləşin ölkəmizdə kütləviliyi bu idman növünə olan sevginin əyani sübutudur. 23 May - Beynəlxalq Güləş Günü münasibəti ilə bütün güləşçiləri, məşqçiləri və güləş ictimaiyyətini təbrik edirik. İnanırıq ki, pəhləvanlarımız Atlanta, Sidney, Afina, Pekin, London və Rio-de-Janeyro, Tokio və Parisdə keçirilmiş Olimpiya Oyunlarında, çoxsaylı dünya və Avropa çempionatlarında qazandıqları uğurların davamını növbəti illərdə də gətirəcək, xalqımızı qürurlandıracaqlar.