"Sərhədçi” İdman Mərkəzində basketbol üzrə Azərbaycan kuboku yarışları keçirilib. Turnirə qrup oyunları ilə start verilib. İlk oyun günündə iki qrup üzrə dörd qarşılaşma təşkil olunub. Açılış oyunu A qrupunda qərarlaşmış "Sabah" və "Gəncə" komandaları arasında keçirilib. "Gəncə" 97:59 hesabı ilə rəqibini üstələyib

B qrupu çərçivəsində NTD - "Olimpik Şəki" oyununda meydan sahibləri 94:83 hesabı ilə qalib gəliblər.

A qrupu çərçivəsində "AAAF Xırdalan" - "Sərhədçi" matçı oynanılıb. Görüşdə Xırdalan təmsilçisi 86:69 hesabı ilə qalib gəlib.

B qrupunda yer alan "Zirvə Astara" və "Neftçi" komandalarının görüşü Bakı təmsilçisinin 93:76 hesablı qələbəsi ilə başa çatıb.

Növbəti yarış günündə isə Azərbaycan Kubokunda finalçıların adına aydınlıq gəlib. Qərb təmsilçisi yarımfinalda "Neftçi İK"nı mübarizədən kənarlaşdırıb. Sərhədçi İdman Mərkəzində keçirilmiş matçda gəncəlilər yerli oyunçularının dominant oyunu sayəsində 83:73 hesablı qələbə qazanıblar.

İkinci yarımfinal qarşılaşmasında NTD "AAAF Xırdalan"ı məğlub edib - 91:84.

Martın 26-da turnirin final oyunu keçirilib. "Sərhədçi” İdman Mərkəzində təşkil olunan final qarşılaşmasında "Gəncə" və NTD komandalarının üz-üzə gəlib. Oyununa gəncəlilər üstün başlayıblar. Lakin oyunun ikinci hissəsində 20 xal fərqindən geri dönüş edən NTD komandası oyunu əlavə vaxta aparıb. Lakin əlavə vaxtda "Gəncə" 100:89 hesablı qələbə qazanaraq kubokun qalibi olub. Finalın ən dəyərli basketbolçusu "Gəncə" komandasının oyun qurucusu Kollin Törner seçilib. Mükafatlandırma mərasimində gənclər və idman nazirinin müavini Mariana Vasileva və Azərbaycan Basketbol Federasiyasının rəyasət heyətinin üzvləri Bəxtiyar Aslanbəyli, Simuzər Feyzullayeva, Elnur Əliyev və Vilayət Vəliyev iştirak ediblər. Kuboku "Gəncə" komandasının kapitanı Amil Həmzəyevə Mariana Vasileva təqdim edib.