Beyl qolfda yeni səhifə yaradır
İdman 12:30 / 24.01.2023
Futbolla vidalaşan Qaret Beyl 2 həftə sonra qolf karyerasına start verəcək. O, bu məlumatı şəxsi İnstaqram hesabında bildirib. Uels millisinin 33 yaşlı keçmiş üzvü peşəkar qolf turnirində oynayacağını açıqlayıb: "Gələn ayın əvvəlində "AT&T Pebble Beach Pro-Am"də oynayacağımı elan etməkdən məmnunam!"
Turnir fevralın 2-dən 5-dək Kaliforniyada keçiriləcək. Burada 156 peşəkar və 156 həvəskar qolfçu iştirak edəcək. İştirakçılar arasında aktyorlar Bill Mürrey və Ceyson Beytman, həmçinin 2022-ci ilin yayında ABŞ Açıq çempionatının qalibi olmuş qolfçu Mett Fitspatrik və əvvəllər dünya üzrə bir nömrəli olan Luk Donald və Cordan Spit də olacaq.
Turnirin mükafat fondu 9 milyon dollardır. Bu, Beylin ilk peşəkar qolf turniri olacaq.
Qeyd edək ki, Q.Beyl yanvarın 9-da futbolçu karyerasını başa vurduğunu açıqlayıb. "Real", "Tottenhem", "Sauthempton", "Los Anceles" kimi komandaların formasını geyinmiş Beyl 5 dəfə Çempionlar Liqasının, 4 dəfə Klublararası Dünya Kubokunun, 3 dəfə La Liqanın, 2 dəfə Avropa Superkubokunun, 2 dəfə İspaniya Super kubokunun və 1 dəfə İspaniya kubokunun qalibi olub.
10474 oxunub
.jpg)
